dost ko mahram bana kar dushman-e-jaan kar diya

dost ko mahram banā kar dushman-e-jāñ kar diyā

tū ne ai dil aap barbādī kā sāmāñ kar diyā

laġhzish-e-ādam to ham tak aa.ī hai mīrās meñ

devtā hote isī ḳhūbī ne insāñ kar diyā

raaz ko jitnā chhupāyā aur ifshā ho gayā

terā chehra aur āñchal ne numāyāñ kar diyā

mehrbāñ ne ġham ġhalat karne kī rakkhī ye sabīl

jab paḌā hai qaht-e-mai to zahr arzāñ kar diyā

aur phailī bū simaT kar phuul ke fānūs meñ

tīrgī ne raushnī ko aur uryāñ kar diyā

kab zavāl aayā hai apnī aql par lekin ise

vasvasoñ ne kund andeshoñ ne hairāñ kar diyā

ik bayābāñ meñ huuñ 'shaukat' andalīb-e-naġhma-zan

shauq ne kin bad-mazāqoñ meñ ġhazal-ḳhvāñ kar diyā

dost ko mahram bana kar dushman-e-jaan kar diya

tu ne ai dil aap barbaadi ka saman kar diya

laghzish-e-adam to hum tak aai hai miras mein

dewta hote isi KHubi ne insan kar diya

raaz ko jitna chhupaya aur ifsha ho gaya

tera chehra aur aanchal ne numayan kar diya

mehrban ne gham ghalat karne ki rakkhi ye sabil

jab paDa hai qaht-e-mai to zahr arzan kar diya

aur phaili bu simaT kar phul ke fanus mein

tirgi ne raushni ko aur uryan kar diya

kab zawal aaya hai apni aql par lekin ise

waswason ne kund andeshon ne hairan kar diya

ek bayaban mein hun 'shaukat' andalib-e-naghma-zan

shauq ne kin bad-mazaqon mein ghazal-KHwan kar diya