دوست سے دشمنی یہ کیا اے دوست

دوست سے دشمنی یہ کیا اے دوست

مجھ وفا دوست پر جفا اے دوست

تنگ ہے اور عرصۂ عالم

تیرا کوچہ ہے دل کشا اے دوست

تر ہوا سن کے ابر دریا بار

میرے اشکوں کا ماجرا اے دوست

ترک مردم شکار ہیں واللہ

تیری آنکھیں ہیں کیا بلا اے دوست

تنکے چنتا ہوں منہ ہوا ہے زرد

غم سے ہوں رشک کہربا اے دوست

تپ سوز دروں سے مرتا ہوں

عشق ہے درد لا دوا اے دوست

ہم سے نفرت ہے دشمنوں سے ربط

ہوئے بیگانے آشنا اے دوست

ترکی ہو جائے گی تمام اپنی

سر توسن جو تو چڑھا اے دوست

افسر و تخت کیا کرے باقیؔ

تیرے کوچہ کا ہے گدا اے دوست