dosti husn-o-mohabbat mein magar hoti hai

dostī husn-o-mohabbat meñ magar hotī hai

zindagī ḳhaar kī phūloñ meñ basar hotī hai

har adā un kī jo manzūr-e-nazar hotī hai

jān-e-dil hotī hai paivast-e-jigar hotī hai

baat bantī hai to ho jaatī hai duniyā haa.il

baat baḌhtī hai to duniyā ko ḳhabar hotī hai

zo.af-e-anvār ko taqdīr samajhne vaale

har javāñ raat hī paiġhām-e-sahar hotī hai

har kisī chashm kā aañsū hai binā-e-tūfāñ

jab tirī yaad bhī hamrāz-e-safar hotī hai

tum mujhe pyaar ke andāz se dekhā na karo

dil dhaḌaktā hai to duniyā ko ḳhabar hotī hai

sun liyā kartā huuñ aksar maiñ kahānī 'ġham' kī

ġham ke andāz meñ jo raat basar hotī hai

dosti husn-o-mohabbat mein magar hoti hai

zindagi KHar ki phulon mein basar hoti hai

har ada un ki jo manzur-e-nazar hoti hai

jaan-e-dil hoti hai paiwast-e-jigar hoti hai

baat banti hai to ho jati hai duniya hail

baat baDhti hai to duniya ko KHabar hoti hai

zoaf-e-anwar ko taqdir samajhne wale

har jawan raat hi paigham-e-sahar hoti hai

har kisi chashm ka aansu hai bina-e-tufan

jab teri yaad bhi hamraaz-e-safar hoti hai

tum mujhe pyar ke andaz se dekha na karo

dil dhaDakta hai to duniya ko KHabar hoti hai

sun liya karta hun aksar main kahani 'gham' ki

gham ke andaz mein jo raat basar hoti hai