dosti ke nae aadab liye phirte hain

dostī ke na.e ādāb liye phirte haiñ

log ab itr meñ tezāb liye phirte haiñ

chāhte haiñ ki haqīqat meñ Dhaleñ aap hī aap

jāgtī āñkhoñ meñ ham ḳhvāb liye phirte haiñ

aañkh uThtī nahīñ bāhar ke nazāroñ kī taraf

ham tabī.at baḌī sairāb liye phirte haiñ

ehtiyātan ki harīfoñ ke na haath aa jaa.eñ

mere purze mire ahbāb liye phirte haiñ

ham ko shohrat kī tamanna na satā.ish kī talab

be-sabab aap ye asbāb liye phirte haiñ

mah-jabīñ haiñ unheñ bindiyā kī zarūrat kyā hai

kyoñ vo mahtāb pe mahtāb liye phirte haiñ

kyā guzartī hai diloñ par ye ḳhudā hī jaane

log chehre baḌe shādāb liye phirte haiñ

dil ke tāroñ se chale chheḌ tarannum ke liye

ham jo ash.ār kī mizrāb liye phirte haiñ

bādbāñ kā hai na patvār kā muhtāj 'naqīb'

us kī kashtī ko jo girdāb liye phirte haiñ

dosti ke nae aadab liye phirte hain

log ab itr mein tezab liye phirte hain

chahte hain ki haqiqat mein Dhalen aap hi aap

jagti aankhon mein hum KHwab liye phirte hain

aankh uThti nahin bahar ke nazaron ki taraf

hum tabiat baDi sairab liye phirte hain

ehtiyatan ki harifon ke na hath aa jaen

mere purze mere ahbab liye phirte hain

hum ko shohrat ki tamanna na sataish ki talab

be-sabab aap ye asbab liye phirte hain

mah-jabin hain unhen bindiya ki zarurat kya hai

kyon wo mahtab pe mahtab liye phirte hain

kya guzarti hai dilon par ye KHuda hi jaane

log chehre baDe shadab liye phirte hain

dil ke taron se chale chheD tarannum ke liye

hum jo ashaar ki mizrab liye phirte hain

baadban ka hai na patwar ka muhtaj 'naqib'

us ki kashti ko jo girdab liye phirte hain