doston ne ye gul khilaya tha

dostoñ ne ye gul khilāyā thā

haath dushman se jā milāyā thā

āstīnoñ meñ saañp paale the

duudh ḳhud hī unheñ pilāyā thā

zaḳhm kaarī bahut lagā dil par

tiir apnoñ ne ik chalāyā thā

barq māñgī nahīñ falak tujh se

ham ne ḳhirman ko ḳhud jalāyā thā

dil ko zaḳhmoñ se chuur honā thā

ishq kī raah par chalāyā thā

pūchhte ho dhuāñ haiñ kyuuñ āñkheñ

jaañ kī bastī meñ dil jalāyā thā

maiñ to bhūlā nahīñ 'sahāb' us ko

us ne kaise mujhe bhulāyā thā

doston ne ye gul khilaya tha

hath dushman se ja milaya tha

aastinon mein sanp pale the

dudh KHud hi unhen pilaya tha

zaKHm kari bahut laga dil par

tir apnon ne ek chalaya tha

barq mangi nahin falak tujh se

hum ne KHirman ko KHud jalaya tha

dil ko zaKHmon se chur hona tha

ishq ki rah par chalaya tha

puchhte ho dhuan hain kyun aankhen

jaan ki basti mein dil jalaya tha

main to bhula nahin 'sahab' us ko

us ne kaise mujhe bhulaya tha