dua ke bas ka nahin bad-dua ke bas ka nahin

duā ke bas kā nahīñ bad-duā ke bas kā nahīñ

ik aisā banda huuñ maiñ jo ḳhudā ke bas kā nahīñ

vo sar paTaktī hai jhuñjhlātī hai mire uupar

bas ek tinkā huuñ maiñ aur havā ke bas kā nahīñ

hujūm-e-chāra-garāñ dang hai tirā bīmār

kisī bhī zahr kisī bhī davā ke bas kā nahīñ

barahna honā paḌegā tujhe bhī mere saath

ki ek lams bhī band-e-qabā ke bas kā nahīñ

mujhe to chhoḌ ki maiñ ik jahān-e-dīgar huuñ

mirā ḳhayāl bhī us be-vafā ke bas kā nahīñ

ḳhamoshiyo! tumheñ merā bayān honā hai

vo dukh huuñ maiñ ki jo saut-o-sadā ke bas kā nahīñ

yahī zamīñ mirā dozaḳh yahī zamīñ jannat

mirā mizāj sazā-o-jazā ke bas kā nahīñ

mire vajūd meñ tū thā jahāñ ḳhalā hai ab

jo tere bas kā na thā ab ḳhalā ke bas kā nahīñ

dua ke bas ka nahin bad-dua ke bas ka nahin

ek aisa banda hun main jo KHuda ke bas ka nahin

wo sar paTakti hai jhunjhlati hai mere upar

bas ek tinka hun main aur hawa ke bas ka nahin

hujum-e-chaara-garan dang hai tera bimar

kisi bhi zahr kisi bhi dawa ke bas ka nahin

barahna hona paDega tujhe bhi mere sath

ki ek lams bhi band-e-qaba ke bas ka nahin

mujhe to chhoD ki main ek jahan-e-digar hun

mera KHayal bhi us be-wafa ke bas ka nahin

KHamoshiyo! tumhein mera bayan hona hai

wo dukh hun main ki jo saut-o-sada ke bas ka nahin

yahi zamin mera dozaKH yahi zamin jannat

mera mizaj saza-o-jaza ke bas ka nahin

mere wajud mein tu tha jahan KHala hai ab

jo tere bas ka na tha ab KHala ke bas ka nahin