dua kije wo bargad aur bhi phule-phale barson

duā kiije vo bargad aur bhī phūle-phale barsoñ

ki jis kī chhāñv meñ ham aap se milte rahe barsoñ

koī jugnū bhaTaktā aa gayā to aa gayā varna

charāġh-e-qabr ban kar ham akele hī jale barsoñ

ye sañg-e-mīl bhī pahle koī bhaTkā musāfir thā

jise apnī hī manzil DhūñDne meñ lag ga.e barsoñ

ye sar jo kaaT kar Tāñge ga.e haiñ in fasīloñ par

isī ātish-bayānī se raheñge bolte barsoñ

ajab sī mausamī fitrat hai apne devtāoñ kī

nahīñ pahchānte vo ham jinheñ puujā kiye barsoñ

na tum hoge na ham hoñge na apnī mahfileñ 'panchhī'

ḳhalā meñ gūñjte rah jā.eñge ye qahqahe barsoñ

dua kije wo bargad aur bhi phule-phale barson

ki jis ki chhanw mein hum aap se milte rahe barson

koi jugnu bhaTakta aa gaya to aa gaya warna

charagh-e-qabr ban kar hum akele hi jale barson

ye sang-e-mil bhi pahle koi bhaTka musafir tha

jise apni hi manzil DhunDne mein lag gae barson

ye sar jo kaT kar Tange gae hain in fasilon par

isi aatish-bayani se rahenge bolte barson

ajab si mausami fitrat hai apne dewtaon ki

nahin pahchante wo hum jinhen puja kiye barson

na tum hoge na hum honge na apni mahfilen 'panchhi'

KHala mein gunjte rah jaenge ye qahqahe barson