dua mein zikr kyun ho muddaa ka

duā meñ zikr kyuuñ ho mudda.ā kā

ki ye sheva nahīñ ahl-e-razā kā

talab merī bahut kuchh hai magar kyā

karam terā hai ik dariyā atā kā

kahāñ tak naaz uThā.e āḳhir ai husn

havas tere mizāj-e-ḳhud satā kā

nahīñ mālūm kyā ai shāh-e-ḳhūbāñ

tujhe kuchh haal apne mubtilā kā

bajā-e-ism-e-āzam aap kā naam

vazīfa hai mirā sub.h o masā kā

ġhazab kā sāmnā hai āshiqoñ ko

dayār-e-haq meñ afvāj-e-balā kā

nisār un par hue achchhe rahe ham

taqāzā thā yahī ḳhū-e-vafā kā

gunahgāro chalo afv-e-ilāhī

bahut mushtāq hai arz-e-ḳhatā kā

tirī mahfil meñ ahl-e-dil ko jalva

nazar aa jā.egā shān-e-ḳhudā kā

uThāyā hai mazā dil ne bahut kuchh

mohabbat ke ġham-e-rāhat-fazā kā

jafā ko bhī vafā samjho ki 'hasrat'

tumheñ haq un se kyā chūn-o-charā kā

dua mein zikr kyun ho muddaa ka

ki ye shewa nahin ahl-e-raza ka

talab meri bahut kuchh hai magar kya

karam tera hai ek dariya ata ka

kahan tak naz uThae aaKHir ai husn

hawas tere mizaj-e-KHud sata ka

nahin malum kya ai shah-e-KHuban

tujhe kuchh haal apne mubtila ka

baja-e-ism-e-azam aap ka nam

wazifa hai mera subh o masa ka

ghazab ka samna hai aashiqon ko

dayar-e-haq mein afwaj-e-bala ka

nisar un par hue achchhe rahe hum

taqaza tha yahi KHu-e-wafa ka

gunahgaro chalo afw-e-ilahi

bahut mushtaq hai arz-e-KHata ka

teri mahfil mein ahl-e-dil ko jalwa

nazar aa jaega shan-e-KHuda ka

uThaya hai maza dil ne bahut kuchh

mohabbat ke gham-e-rahat-faza ka

jafa ko bhi wafa samjho ki 'hasrat'

tumhein haq un se kya chun-o-chara ka