dua salam sar-e-rahguzar kar lena

duā salām sar-e-rahguzār kar lenā

magar har ek pe mat e.atibār kar lenā

udhar na bhuul ke jaanā havā jidhar kī chale

ye dil pe jabr sahī iḳhtiyār kar lenā

haiñ āstīnoñ meñ ḳhanjar zarā sañbhal ke miyāñ

ravā-ravī meñ na qaul-o-qarār kar lenā

mirā ḳhamīr hai apne vatan kī miTTī se

mirī ḳhatāoñ meñ ye bhī shumār kar lenā

ḳharāb ho chukī maanā rafāqatoñ kī fazā

gale lagā ke unheñ ḳhush-gavār kar lenā

ye vo ḳhazāna hai jis kā badal nahīñ koī

ta.alluqāt-e-kuhan ustuvār kar lenā

jo gird-o-pesh baḌhe zor kam-ayyārī kā

buland apnī anā kā hisār kar lenā

maiñ ab ke yaad kī ḳhil.at pahan ke ā.ūñgā

ye merā va.ada rahā intizār kar lenā

nayā nahīñ hai tamāshā ye dilbaroñ kā 'sahar'

hai un kā khel diloñ kā shikār kar lenā

dua salam sar-e-rahguzar kar lena

magar har ek pe mat eatibar kar lena

udhar na bhul ke jaana hawa jidhar ki chale

ye dil pe jabr sahi iKHtiyar kar lena

hain aastinon mein KHanjar zara sanbhal ke miyan

rawa-rawi mein na qaul-o-qarar kar lena

mera KHamir hai apne watan ki miTTi se

meri KHataon mein ye bhi shumar kar lena

KHarab ho chuki mana rafaqaton ki faza

gale laga ke unhen KHush-gawar kar lena

ye wo KHazana hai jis ka badal nahin koi

talluqat-e-kuhan ustuwar kar lena

jo gird-o-pesh baDhe zor kam-ayyari ka

buland apni ana ka hisar kar lena

main ab ke yaad ki KHilat pahan ke aaunga

ye mera wada raha intizar kar lena

naya nahin hai tamasha ye dilbaron ka 'sahar'

hai un ka khel dilon ka shikar kar lena