dua tasir se aari wazaif raegan yani

duā tāsīr se aarī vazā.if rā.egāñ ya.anī

amal radd-e-balā ke ho ga.e saare dhuāñ ya.anī

haqīqat kyā hai is kī kaun jaane kaun batlā.e

rahā hai zindagī kā ham-safar paiham gumāñ ya.anī

badalte jā rahe haiñ zāviye sūraj kī nazroñ ke

zamīñ nārāz lagtī hai ḳhafā hai āsmāñ ya.anī

jo dekhoge to lagtā hai sarāb-e-dasht bhī dariyā

jo socho tum agar to ḳhvāb sā hai ye jahāñ ya.anī

chalo anjām ko āġhāz ke nuqte pe le aa.eñ

bichhaḌte haiñ vahīñ chal kar mile the ham jahāñ ya.anī

jahān-e-rang-o-bū kī bas haqīqat aur kyā hogī

guzargāh-e-zamāna kā hai shāyad ye nishāñ ya.anī

hai bas itnā faqat ham aap ko masrūf rakhte haiñ

vagarna shā.irī 'jāved' hai kār-e-ziyāñ ya.anī

dua tasir se aari wazaif raegan yani

amal radd-e-bala ke ho gae sare dhuan yani

haqiqat kya hai is ki kaun jaane kaun batlae

raha hai zindagi ka ham-safar paiham guman yani

badalte ja rahe hain zawiye suraj ki nazron ke

zamin naraaz lagti hai KHafa hai aasman yani

jo dekhoge to lagta hai sarab-e-dasht bhi dariya

jo socho tum agar to KHwab sa hai ye jahan yani

chalo anjam ko aaghaz ke nuqte pe le aaen

bichhaDte hain wahin chal kar mile the hum jahan yani

jahan-e-rang-o-bu ki bas haqiqat aur kya hogi

guzargah-e-zamana ka hai shayad ye nishan yani

hai bas itna faqat hum aap ko masruf rakhte hain

wagarna shairi 'jawed' hai kar-e-ziyan yani