dua ye hai ki na de sath ab hayat bahut

duā ye hai ki na de saath ab hayāt bahut

ki mujh pe bhārī hai ġham kī siyāh raat bahut

mujhī se ishq vafāoñ kī kā.enāt ko thā

mujhī ko roī vafāoñ kī kā.enāt bahut

tamām raat tumhārā hī intizār rahā

tumhīñ ko maiñ ne pukārā tamām raat bahut

har ik umang ubhartī thī Duub jaane ko

bahut qarīb thī hadd-e-ta.a.yyunāt bahut

vo merī terī mohabbat kī baat hai pyāre

chalī hai jo bhī zamāne meñ koī baat bahut

jalī jalī sī guzārī thī zindagī maiñ ne

bujhī bujhī sī rahī hai mirī hayāt bahut

ḳhudā gavāh mire ġhaznavī ko kyā ma.alūm

burā sā lagtā hai vīrān somnāt bahut

mirī udaas nigāhoñ ko dekhne vaalo

na.e khilāḌī ko hotī hai ek maat bahut

dua ye hai ki na de sath ab hayat bahut

ki mujh pe bhaari hai gham ki siyah raat bahut

mujhi se ishq wafaon ki kaenat ko tha

mujhi ko roi wafaon ki kaenat bahut

tamam raat tumhaara hi intizar raha

tumhin ko main ne pukara tamam raat bahut

har ek umang ubharti thi Dub jaane ko

bahut qarib thi hadd-e-tayyunat bahut

wo meri teri mohabbat ki baat hai pyare

chali hai jo bhi zamane mein koi baat bahut

jali jali si guzari thi zindagi main ne

bujhi bujhi si rahi hai meri hayat bahut

KHuda gawah mere ghaznawi ko kya malum

bura sa lagta hai viran somnat bahut

meri udas nigahon ko dekhne walo

nae khilaDi ko hoti hai ek mat bahut