duaen mang rahe hain kai KHayal abhi

du'ā.eñ maañg rahe haiñ ka.ī ḳhayāl abhī

ḳhudā ke ghar se farishtoñ ko mat nikāl abhī

dabā le dard abhī āñsuoñ ko paal abhī

tirā ye āḳhirī sikka hai mat uchhāl abhī

havā se kahnā zarā aur intizār kare

karegī raat charāġhoñ kī dekh-bhāl abhī

ga.e dinoñ kī amānat usī kī nok pe hai

hamāre siine se ḳhanjar ye mat nikāl abhī

ḳhudā kā shukr parinde safar se lauT aa.e

shikāriyoñ ke agarche bichhe haiñ jaal abhī

vafā ke khel meñ nau-vārid-e-bisāt huuñ maiñ

samajh meñ aatī nahīñ dushmanoñ kī chaal abhī

dhiyān aap ke ehsān kā bhī hai lekin

kisī ke qarz meñ Duubā huuñ bāl-bāl abhī

bhañvar se bach ke chalī aa.ī ek naav 'fahīm'

na pūchh kitnā samundar ko hai malāl abhī

du'aen mang rahe hain kai KHayal abhi

KHuda ke ghar se farishton ko mat nikal abhi

daba le dard abhi aansuon ko pal abhi

tera ye aaKHiri sikka hai mat uchhaal abhi

hawa se kahna zara aur intizar kare

karegi raat charaghon ki dekh-bhaal abhi

gae dinon ki amanat usi ki nok pe hai

hamare sine se KHanjar ye mat nikal abhi

KHuda ka shukr parinde safar se lauT aae

shikariyon ke agarche bichhe hain jal abhi

wafa ke khel mein nau-warid-e-bisat hun main

samajh mein aati nahin dushmanon ki chaal abhi

dhiyan aap ke ehsan ka bhi hai lekin

kisi ke qarz mein Duba hun baal-baal abhi

bhanwar se bach ke chali aai ek naw 'fahim'

na puchh kitna samundar ko hai malal abhi