dukh apna chhupane mein zara waqt lagega

dukh apnā chhupāne meñ zarā vaqt lagegā

ab us ko bhulāne meñ zarā vaqt lagegā

tū ne jo pukārā to palaT ā.ūñgī vāpas

haañ lauT ke aane meñ zarā vaqt lagegā

likkhā thā baḌe chaav se jis naam ko dil par

vo naam miTāne meñ zarā vaqt lagegā

detā hai kisī aur ko tarjīh vo mujh par

us ko ye jatāne meñ zarā vaqt lagegā

jis shāḳh pe phal-phūl nahīñ aa.e haiñ ab tak

vo shāḳh jhukāne meñ zarā vaqt lagegā

sab ranj-o-alam milne chale aa.e haiñ mujh se

mahfil ko sajāne meñ zarā vaqt lagegā

maiñ dekh bhī saktī huuñ kisī aur ko tujh sañg

ye dard kamāne meñ zarā vaqt lagegā

jo aag 'sadaf' hijr ne hai dil meñ lagā.ī

vo aag bujhāne meñ zarā vaqt lagegā

dukh apna chhupane mein zara waqt lagega

ab us ko bhulane mein zara waqt lagega

tu ne jo pukara to palaT aaungi wapas

han lauT ke aane mein zara waqt lagega

likkha tha baDe chaw se jis nam ko dil par

wo nam miTane mein zara waqt lagega

deta hai kisi aur ko tarjih wo mujh par

us ko ye jatane mein zara waqt lagega

jis shaKH pe phal-phul nahin aae hain ab tak

wo shaKH jhukane mein zara waqt lagega

sab ranj-o-alam milne chale aae hain mujh se

mahfil ko sajaane mein zara waqt lagega

main dekh bhi sakti hun kisi aur ko tujh sang

ye dard kamane mein zara waqt lagega

jo aag 'sadaf' hijr ne hai dil mein lagai

wo aag bujhane mein zara waqt lagega