dukh-dard musibat gham-o-alam nahin hai

dukh-dard musībat ġham-o-ālām nahīñ hai

kis dil meñ bhalā fasl-e-ḳhūñ-āshām nahīñ hai

jaarī hai abhī khel vahī zulm-o-sitam kā

āġhāz hī āġhāz hai anjām nahīñ hai

hotī hai shab-o-roz hī rishtoñ kī tijārat

duniyā meñ mohabbat kā kahīñ naam nahīñ hai

auroñ ke liye sub.h tire lutf-o-karam kī

kyā ham pe ināyat kī koī shaam nahīñ hai

qātil bhī haiñ mahfūz siyāsat kī badaulat

ab un pe kisī qatl kā ilzām nahīñ hai

chehre ko chhupāte haiñ yahāñ log 'sharāfat'

chehre ko dikhāne kā chalan aam nahīñ hai

dukh-dard musibat gham-o-alam nahin hai

kis dil mein bhala fasl-e-KHun-asham nahin hai

jari hai abhi khel wahi zulm-o-sitam ka

aaghaz hi aaghaz hai anjam nahin hai

hoti hai shab-o-roz hi rishton ki tijarat

duniya mein mohabbat ka kahin nam nahin hai

auron ke liye subh tere lutf-o-karam ki

kya hum pe inayat ki koi sham nahin hai

qatil bhi hain mahfuz siyasat ki badaulat

ab un pe kisi qatl ka ilzam nahin hai

chehre ko chhupate hain yahan log 'sharafat'

chehre ko dikhane ka chalan aam nahin hai