دکھ درد مصیبت غم و آلام نہیں ہے

دکھ درد مصیبت غم و آلام نہیں ہے

کس دل میں بھلا فصل خوں آشام نہیں ہے

جاری ہے ابھی کھیل وہی ظلم و ستم کا

آغاز ہی آغاز ہے انجام نہیں ہے

ہوتی ہے شب و روز ہی رشتوں کی تجارت

دنیا میں محبت کا کہیں نام نہیں ہے

اوروں کے لئے صبح ترے لطف و کرم کی

کیا ہم پہ عنایت کی کوئی شام نہیں ہے

قاتل بھی ہیں محفوظ سیاست کی بدولت

اب ان پہ کسی قتل کا الزام نہیں ہے

چہرے کو چھپاتے ہیں یہاں لوگ شرافتؔ

چہرے کو دکھانے کا چلن عام نہیں ہے