دکھ درد رنج و غم کا نہ کوئی ملال کر

دکھ درد رنج و غم کا نہ کوئی ملال کر

ہوتا ہے سب خدا کی طرف سے خیال کر

دشوار ہے یہ چیز بھی رکھنا سنبھال کر

پہلو سے دے رہا ہوں میں دل کو نکال کر

ماضی تو خیر لوٹ کے آنے سے اب رہا

بہتر ہے میرے دوست یہی فکر حال کر

مجروح اس سے ہوتا ہے اپنا وقار بھی

مشکل میں دوستوں سے نہ کوئی سوال کر

ڈس لے گا ایک روز اسے ہی خبر نہیں

جو سانپ آستین میں رکھتا ہے پال کر

جس کی شرافتوں کی قسم کھا رہے تھے لوگ

وہ بات بھی کرے ہے تو خنجر نکال کر

کہنا ہے جو بھی شمسیؔ کہو اس کے روبرو

کیا فائدہ ہے بعد میں کیچڑ اچھال کر