dukh dard ranj-o-gham ka na koi malal kar

dukh dard ranj-o-ġham kā na koī malāl kar

hotā hai sab ḳhudā kī taraf se ḳhayāl kar

dushvār hai ye chiiz bhī rakhnā sañbhāl kar

pahlū se de rahā huuñ maiñ dil ko nikāl kar

maazī to ḳhair lauT ke aane se ab rahā

behtar hai mere dost yahī fikr-e-hāl kar

majrūh is se hotā hai apnā vaqār bhī

mushkil meñ dostoñ se na koī savāl kar

Das legā ek roz use hī ḳhabar nahīñ

jo saañp āstīn meñ rakhtā hai paal kar

jis kī sharāfatoñ kī qasam khā rahe the log

vo baat bhī kare hai to ḳhanjar nikāl kar

kahnā hai jo bhī 'shamsī' kaho us ke rū-ba-rū

kyā fā.eda hai baad meñ kīchaḌ uchhāl kar

dukh dard ranj-o-gham ka na koi malal kar

hota hai sab KHuda ki taraf se KHayal kar

dushwar hai ye chiz bhi rakhna sanbhaal kar

pahlu se de raha hun main dil ko nikal kar

mazi to KHair lauT ke aane se ab raha

behtar hai mere dost yahi fikr-e-haal kar

majruh is se hota hai apna waqar bhi

mushkil mein doston se na koi sawal kar

Das lega ek roz use hi KHabar nahin

jo sanp aastin mein rakhta hai pal kar

jis ki sharafaton ki qasam kha rahe the log

wo baat bhi kare hai to KHanjar nikal kar

kahna hai jo bhi 'shamsi' kaho us ke ru-ba-ru

kya faeda hai baad mein kichaD uchhaal kar