دکھ کی دیوار گرانے سے رہی

دکھ کی دیوار گرانے سے رہی

یعنی میں خود کو بچانے سے رہی

چھوڑ جائے گی یہ ریزہ کر کے

زندگی ساتھ نبھانے سے رہی

دل نے سوچا ہے تری وحشت کو

سو مجھے نیند تو آنے سے رہی

درد ہوتے ہی چھلک جائیں گے

اشک آنکھوں میں چھپانے سے رہی

خود ہی احوال سمجھ لے میرا

میں تجھے دل تو دکھانے سے رہی

دور ہو جائیں اندھیرے مجھ سے

ایسی قندیل جلانے سے رہی

اب یہاں اہل ستم رہتے ہیں

اب میں زنجیر ہلانے سے رہی

لوگ محروم سماعت ہیں حراؔ

حال غم ان کو سنانے سے رہی