dukh mein mera hua kare koi

dukh meñ merā huā kare koī

mere sañg sañg chalā kare koī

maiñ azal se huuñ aaj tak tanhā

mere dukh kī davā kare koī

falsafe to samajh se bāhar haiñ

saadī bāteñ kiyā kare koī

merā dukh bhī bhalā koī dukh hai

tere dukh kī davā kare koī

yuuñ to kahne ko sab hī haiñ apne

apnā sach-much huā kare koī

qatl us ne kiyā hai nazroñ se

aise qātil kā kyā kare koī

merī kashtī bachā.ī hai rab ne

nāḳhudā terā kyā kare koī

marne vāloñ ko mil gayā ārām

zinda lāshoñ kā kyā kare koī

ḳhud to sarkash hai aur kahtā hai

mujh se jhuk kar milā kare koī

aap kā ho gayā huuñ maiñ 'sāhil'

aa ke itnā kahā kare koī

dukh mein mera hua kare koi

mere sang sang chala kare koi

main azal se hun aaj tak tanha

mere dukh ki dawa kare koi

falsafe to samajh se bahar hain

sadi baaten kiya kare koi

mera dukh bhi bhala koi dukh hai

tere dukh ki dawa kare koi

yun to kahne ko sab hi hain apne

apna sach-much hua kare koi

qatl us ne kiya hai nazron se

aise qatil ka kya kare koi

meri kashti bachai hai rab ne

naKHuda tera kya kare koi

marne walon ko mil gaya aaram

zinda lashon ka kya kare koi

KHud to sarkash hai aur kahta hai

mujh se jhuk kar mila kare koi

aap ka ho gaya hun main 'sahil'

aa ke itna kaha kare koi