dukh tamasha to nahin hai ki dikhaen baba

dukh tamāshā to nahīñ hai ki dikhā.eñ baabā

ro chuke aur na ab ham ko rulā.eñ baabā

kaisī dahshat hai ki ḳhvāhish se bhī Dar lagtā hai

munjamid ho ga.ī hoñToñ pe duā.eñ baabā

maut hai narm-dilī ke liye badnām un meñ

haiñ yahāñ aur bhī kuchh aisī balā.eñ baabā

daaġh dikhlā.eñ ham un ko to ye miT jā.eñge kyā

ġham-gusāroñ se kaho yuuñ na satā.eñ baabā

ham-safīrān-e-chaman yaad to karte hoñge

par qafas tak nahīñ ātīñ vo sadā.eñ baabā

patte shāḳhoñ se baraste rahe ashkoñ kī tarah

raat bhar chaltī rahīñ tez havā.eñ baabā

aag jañgal meñ bhaḌaktī hai 'ziyā' shahr meñ baat

kaise bhaḌke hue sho.aloñ ko bujhā.eñ baabā

dukh tamasha to nahin hai ki dikhaen baba

ro chuke aur na ab hum ko rulaen baba

kaisi dahshat hai ki KHwahish se bhi Dar lagta hai

munjamid ho gai honTon pe duaen baba

maut hai narm-dili ke liye badnam un mein

hain yahan aur bhi kuchh aisi balaen baba

dagh dikhlaen hum un ko to ye miT jaenge kya

gham-gusaron se kaho yun na sataen baba

ham-safiran-e-chaman yaad to karte honge

par qafas tak nahin aatin wo sadaen baba

patte shaKHon se baraste rahe ashkon ki tarah

raat bhar chalti rahin tez hawaen baba

aag jangal mein bhaDakti hai 'ziya' shahr mein baat

kaise bhaDke hue shoalon ko bujhaen baba