dukh to ye hai zindagi ka KHwab pura rah gaya

dukh to ye hai zindagī kā ḳhvāb puurā rah gayā

tū mukammal ho ga.ī aur maiñ adhūrā rah gayā

mujh ko bachpan se hī logoñ kī samajh aane lagī

so kisī ne baat jo bhī kī maiñ zer-e-tah gayā

ab mire andar ḳhas-o-ḳhāshāk tak baaqī nahīñ

ashk ban kar vo mirī āñkhoñ se itnā bah gayā

mujh sā bad-qismat na koī hogā tere shahr meñ

jo gharauñdā ḳhvāb kā maiñ ne banāyā Dhah gayā

sochtā huuñ chup lagī shakloñ kī hālat dekh kar

bach gayā vo jis ke muñh meñ jo bhī aa.ī kah gayā

ab mujhe vo zaḳhm de jo maut kā bā'is bane

varna terā hijr to merā kaleja sah gayā

dukh to ye hai zindagi ka KHwab pura rah gaya

tu mukammal ho gai aur main adhura rah gaya

mujh ko bachpan se hi logon ki samajh aane lagi

so kisi ne baat jo bhi ki main zer-e-tah gaya

ab mere andar KHas-o-KHashak tak baqi nahin

ashk ban kar wo meri aankhon se itna bah gaya

mujh sa bad-qismat na koi hoga tere shahr mein

jo gharaunda KHwab ka main ne banaya Dhah gaya

sochta hun chup lagi shaklon ki haalat dekh kar

bach gaya wo jis ke munh mein jo bhi aai kah gaya

ab mujhe wo zaKHm de jo maut ka ba'is bane

warna tera hijr to mera kaleja sah gaya