duniya ajib thi na zamana ajib tha

duniyā ajiib thī na zamāna ajiib thā

un se ta'alluqāt nibhānā ajiib thā

ab tak ḳhalish hai baaqī zamān-o-makān meñ

ahvāl-e-dil kisī ko sunānā ajiib thā

ḳhushbū uḌā ke le ga.ī bād-e-sabā ġhalat

sehn-e-chaman meñ bhañvaroñ kā aanā ajiib thā

ye tarz-e-bandagī to nahīñ thā ḳhatā muaaf

naqsh-e-qadam ko sar pa uThānā ajiib thā

sun kar jise zamāna bhī hairat-zada huā

teshe ne jo likhā vo fasāna ajiib thā

mehr-o-vafā ke zikr pa kahnā paḌā mujhe

un kī nazar meñ merā Thikāna ajiib thā

vo pāk-bāz thā ki na thā ye ḳhabar nahīñ

lekin mirā fareb meñ aanā ajiib thā

bas vo hī vo the un kī hī sūrat thī har taraf

yādoñ kā merī ā.ina-ḳhāna ajiib thā

vo bhī hai kuchh ajiib 'rasā' mil gayā hai jo

jo kho gayā hai vo bhī ḳhazāna ajiib thā

duniya ajib thi na zamana ajib tha

un se ta'alluqat nibhana ajib tha

ab tak KHalish hai baqi zaman-o-makan mein

ahwal-e-dil kisi ko sunana ajib tha

KHushbu uDa ke le gai baad-e-saba ghalat

sehn-e-chaman mein bhanwaron ka aana ajib tha

ye tarz-e-bandagi to nahin tha KHata muaf

naqsh-e-qadam ko sar pa uThana ajib tha

sun kar jise zamana bhi hairat-zada hua

teshe ne jo likha wo fasana ajib tha

mehr-o-wafa ke zikr pa kahna paDa mujhe

un ki nazar mein mera Thikana ajib tha

wo pak-baz tha ki na tha ye KHabar nahin

lekin mera fareb mein aana ajib tha

bas wo hi wo the un ki hi surat thi har taraf

yaadon ka meri aaina-KHana ajib tha

wo bhi hai kuchh ajib 'rasa' mil gaya hai jo

jo kho gaya hai wo bhi KHazana ajib tha