دنیا بدل بھی سکتی ہے کوشش تو یار کر

دنیا بدل بھی سکتی ہے کوشش تو یار کر

خود پر تو اعتبار ذرا ایک بار کر

دل دے رہا تھا اس کو تبھی ہوش نے کہا

اتنی حسین چیز کا مت کاروبار کر

جھوٹا اگر ہو یار تو ہر وعدہ توڑ دے

سچا لگے تو جان بھی اس پر نثار کر

اب تک ترے حجاب سے تھی بے قراریاں

اب بے حجاب ہو کے ذرا بے قرار کر

میں عام آدمی ہوں نہیں پیر اولیا

میری ہر ایک بات پہ مت اعتبار کر

دنیا نے ایسا زخم دیا بھر سکا نہ جو

دنیا کو اپنا زخم دکھا شرمسار کر