duniya duniya sair safar thi shauq ki rah tamam hui

duniyā duniyā sair safar thī shauq kī raah tamām huī

is bastī meñ sub.h huī thī is bastī meñ shaam huī

kaisī lahar hai sard havā kī saare ThiThure baiThe haiñ

kal tak to bas ham chup chup the aaj ḳhamoshī aam huī

mausam badle dil kā sūraj dukh kī ghaTā meñ Duub gayā

pyaar ke lail-o-nahār na pūchho shaam se pahle shaam huī

dard kī barkhā TuuT ke barsī phuuT bahe palkoñ ke band

is bārish meñ vaz-e-vafā kī har koshish nākām huī

halkī sī ik lahar thī ab vo tūfāñ ban kar ubhrī hai

ik be-nām ḳhalish thī pahle ab vo terā naam huī

tere sar par raat kī raanī mahak mahak kar phuul banī

mere sar meñ phuul kī ḳhushbū shorish kā paiġhām huī

chhoTā sā vo dil kā TukḌā kyā kyā fasleñ detā thā

haif qimār-e-ishq ke kāran kaisī zamīñ nīlām huī

pahle to ik saaya ubhrā phir saaya tasvīr banā

ab vo shakl mirī dīvār pe goyā naqsh-e-davām huī

ek amal ke do pahlū āvāz-e-salāsil jazb kī chup

vo bhī mere naam huī thī ye bhī mere naam huī

ahl-e-hunar kī duniyā-talabī shauq-e-shahādat kyā kartī

ik talvār thī arz-e-hunar kī vo bhī zeb-e-niyām huī

'bāqar' tum sayyad-zāde ho sar ko uThā.e phirnā kyā

shauq-o-talab kī hujjat-e-āḳhir āḳhir-kār tamām huī

duniya duniya sair safar thi shauq ki rah tamam hui

is basti mein subh hui thi is basti mein sham hui

kaisi lahar hai sard hawa ki sare ThiThure baiThe hain

kal tak to bas hum chup chup the aaj KHamoshi aam hui

mausam badle dil ka suraj dukh ki ghaTa mein Dub gaya

pyar ke lail-o-nahaar na puchho sham se pahle sham hui

dard ki barkha TuT ke barsi phuT bahe palkon ke band

is barish mein waz-e-wafa ki har koshish nakaam hui

halki si ek lahar thi ab wo tufan ban kar ubhri hai

ek be-nam KHalish thi pahle ab wo tera nam hui

tere sar par raat ki rani mahak mahak kar phul bani

mere sar mein phul ki KHushbu shorish ka paigham hui

chhoTa sa wo dil ka TukDa kya kya faslen deta tha

haif qimar-e-ishq ke karan kaisi zamin nilam hui

pahle to ek saya ubhra phir saya taswir bana

ab wo shakl meri diwar pe goya naqsh-e-dawam hui

ek amal ke do pahlu aawaz-e-salasil jazb ki chup

wo bhi mere nam hui thi ye bhi mere nam hui

ahl-e-hunar ki duniya-talabi shauq-e-shahadat kya karti

ek talwar thi arz-e-hunar ki wo bhi zeb-e-niyam hui

'baqar' tum sayyad-zade ho sar ko uThae phirna kya

shauq-o-talab ki hujjat-e-aKHir aaKHir-kar tamam hui