duniya-e-dani hai matlab ki sab rishte nate toD diye

duniyā-e-danī hai matlab kī sab rishte naate toḌ diye

ab ḳhud pe bharosa karnā hai jitne the sahāre chhoḌ diye

ab dil se dil kā milnā kyā bas haath milānā kaafī hai

derīna taur tarīqoñ ne chalte chalte dam toḌ diye

duniyā-e-mohabbat ke andar nafrat kā añdherā jin se baḌhe

us daur-e-taraqqī ke aise jitne haiñ uThā kar toḌ diye

jo āñdhiyoñ se Takrā bhī sakeñ zulmat kā fusūñ bhī toḌ sakeñ

tāqoñ meñ sajā kar pahle hī to kuchh aise rakh chhoḌ diye

kyā milnā-julnā aapas meñ ye sab kahne kī bāteñ haiñ

ham dekh chuke is daur ne to dil toḌ diye sar joḌ diye

jab zulm ke tūfāñ umḌe haiñ jab yaas ke bādal chhā.e haiñ

duniyā ko diyā hai azm-e-javāñ tārīḳh ko ham ne moḌ diye

ai daur-e-siyāsat ahd-e-zabūñ 'jarrār' se ye ummīd na rakh

us dar pe jhukā dī peshānī haath us ke aage joḌ diye

duniya-e-dani hai matlab ki sab rishte nate toD diye

ab KHud pe bharosa karna hai jitne the sahaare chhoD diye

ab dil se dil ka milna kya bas hath milana kafi hai

derina taur tariqon ne chalte chalte dam toD diye

duniya-e-mohabbat ke andar nafrat ka andhera jin se baDhe

us daur-e-taraqqi ke aise jitne hain uTha kar toD diye

jo aandhiyon se Takra bhi saken zulmat ka fusun bhi toD saken

taqon mein saja kar pahle hi to kuchh aise rakh chhoD diye

kya milna-julna aapas mein ye sab kahne ki baaten hain

hum dekh chuke is daur ne to dil toD diye sar joD diye

jab zulm ke tufan umDe hain jab yas ke baadal chhae hain

duniya ko diya hai azm-e-jawan tariKH ko hum ne moD diye

ai daur-e-siyasat ahd-e-zabun 'jarrar' se ye ummid na rakh

us dar pe jhuka di peshani hath us ke aage joD diye