duniya-e-fikr-e-nau ka tamannai ban gaya

duniyā-e-fikr-e-nau kā tamannā.ī ban gayā

har aadmī hayāt kā shaidā.ī ban gayā

jab se dil un kī zulf kā saudā.ī ban gayā

mere liye vo bā.is-e-rusvā.ī ban gayā

vo dil jo apne aap se begāna ho gayā

sach to ye hai ki markaz-e-dānā.ī ban gayā

tūfān-e-ġham se khelegā vo kis tarah bhalā

sāhil pe baiTh kar jo tamāshā.ī ban gayā

us ġham pe hoñ nisār hazāroñ masarrateñ

vo ġham jo vajh-e-sabr-o-shakebā.ī ban gayā

merī nigāh fikr ke sāñche meñ Dhal ga.ī

merā nafas shu.ūr kī gahrā.ī ban gayā

merā ḳhayāl kam nahīñ tere jamāl se

merā ḳhayāl bhī tirī añgḌā.ī ban gayā

merā ḳhulūs merā amal tere ishq meñ

doshīza-e-hayāt kī ra.anā.ī ban gayā

vo iztirāb-e-shauq jise zindagī kaheñ

dil kā sukūñ nazar kā tavānā.ī ban gayā

kyūñkar na ho kamāl kā jauhar liye hue

ā.īna tere husn kī yaktā.ī ban gayā

jo mujh ko merī ḳhalvat-e-ġham se milā 'nigār'

vo ḳhvāb rūh-e-anjuman-ārā.ī ban gayā

duniya-e-fikr-e-nau ka tamannai ban gaya

har aadmi hayat ka shaidai ban gaya

jab se dil un ki zulf ka saudai ban gaya

mere liye wo bais-e-ruswai ban gaya

wo dil jo apne aap se begana ho gaya

sach to ye hai ki markaz-e-danai ban gaya

tufan-e-gham se khelega wo kis tarah bhala

sahil pe baiTh kar jo tamashai ban gaya

us gham pe hon nisar hazaron masarraten

wo gham jo wajh-e-sabr-o-shakebai ban gaya

meri nigah fikr ke sanche mein Dhal gai

mera nafas shuur ki gahrai ban gaya

mera KHayal kam nahin tere jamal se

mera KHayal bhi teri angDai ban gaya

mera KHulus mera amal tere ishq mein

doshiza-e-hayat ki ranai ban gaya

wo iztirab-e-shauq jise zindagi kahen

dil ka sukun nazar ka tawanai ban gaya

kyunkar na ho kamal ka jauhar liye hue

aaina tere husn ki yaktai ban gaya

jo mujh ko meri KHalwat-e-gham se mila 'nigar'

wo KHwab ruh-e-anjuman-arai ban gaya