duniya-e-ishq mein kisi qabil nahin raha

duniyā-e-ishq meñ kisī qābil nahīñ rahā

jo dil tirī nazar se girā dil nahīñ rahā

le jā rahā hai shauq chalā jā rahā huuñ maiñ

ab imtiyāz-e-jāda-o-manzil nahīñ rahā

tārīk ho gayā hai zamāna nigāh meñ

pahlū meñ jab se vo mah-e-kāmil nahīñ rahā

kyoñ mai-kashoñ pe uThtī haiñ duniyā kī uñgliyāñ

ḳhud shaiḳh ehtirām ke qābil nahīñ rahā

ab kyūñkar un ko la.al-e-badaḳhshāñ kahe koī

jab dil kā ḳhuun ashkoñ meñ shāmil nahīñ rahā

e.ajāz merī chashm-e-haqīqat-nigar kā dekh

ab koī parda parda-e-hā.il nahīñ rahā

'shaidā' kahāñ vo aish vo ishrat vo imbisāt

mahfil meñ jab vo zīnat-e-mahfil nahīñ rahā

duniya-e-ishq mein kisi qabil nahin raha

jo dil teri nazar se gira dil nahin raha

le ja raha hai shauq chala ja raha hun main

ab imtiyaz-e-jada-o-manzil nahin raha

tarik ho gaya hai zamana nigah mein

pahlu mein jab se wo mah-e-kaamil nahin raha

kyon mai-kashon pe uThti hain duniya ki ungliyan

KHud shaiKH ehtiram ke qabil nahin raha

ab kyunkar un ko lal-e-badaKHshan kahe koi

jab dil ka KHun ashkon mein shamil nahin raha

eajaz meri chashm-e-haqiqat-nigar ka dekh

ab koi parda parda-e-hail nahin raha

'shaida' kahan wo aish wo ishrat wo imbisat

mahfil mein jab wo zinat-e-mahfil nahin raha