دنیائے محبت ویراں ہے بے چین دل ناکام نہیں

دنیائے محبت ویراں ہے بے چین دل ناکام نہیں

پہلو میں نشان‌ زخم نہیں آنکھوں میں لہو کا نام نہیں

نظروں سے ملی تھیں جب نظریں بربادئ دل کا خدشہ تھا

آغاز ہی میں ہم سمجھے تھے اچھا اس کا انجام نہیں

مایوس پیام اب کان بھی ہیں محروم تکلم ہیں لب بھی

خاموش ہیں وہ ہم بھی چپ ہیں اب سلسلۂ پیغام نہیں

برباد محبت کر کے مجھے بے کار الم ہے کیوں تم کو

کوتاہیٔ قسمت کا ہے گلہ تم پر تو کوئی الزام نہیں

پیمان وفا تم توڑ چکے منہ عشق سے ہم بھی موڑ چکے

اب دل میں تمہاری یاد نہیں اب لب پہ تمہارا نام نہیں

کوئل جو کبھی کوک اٹھتی ہے دل میں مرے اک ہوک اٹھتی ہے

برسوں ہوئے ترک الفت کو پر دل کو ہنوز آرام نہیں

تنہا جو کبھی رہتا ہوں ولیؔ کچھ دل کی کہی کہتا ہوں ولیؔ

اب فکر سخن کا شوق نہیں اب بزم سخن سے کام نہیں