duniya-e-mohabbat viran hai bechain dil-e-nakaam nahin

duniyā-e-mohabbat vīrāñ hai bechain dil-e-nākām nahīñ

pahlū meñ nishān-e-zaḳhm nahīñ āñkhoñ meñ lahū kā naam nahīñ

nazroñ se milī thiiñ jab nazreñ barbādī-e-dil kā ḳhadsha thā

āġhāz hī meñ ham samjhe the achchhā is kā anjām nahīñ

māyūs-e-payām ab kaan bhī haiñ mahrūm-e-takallum haiñ lab bhī

ḳhāmosh haiñ vo ham bhī chup haiñ ab silsila-e-paiġhām nahīñ

barbād-e-mohabbat kar ke mujhe bekār alam hai kyoñ tum ko

kotāhī-e-qismat kā hai gila tum par to koī ilzām nahīñ

paimān-e-vafā tum toḌ chuke muñh ishq se ham bhī moḌ chuke

ab dil meñ tumhārī yaad nahīñ ab lab pe tumhārā naam nahīñ

koyal jo kabhī kuuk uThtī hai dil meñ mire ik huuk uThtī hai

barsoñ hue tark-e-ulfat ko par dil ko hanūz ārām nahīñ

tanhā jo kabhī rahtā huuñ 'valī' kuchh dil kī kahī kahtā huuñ 'valī'

ab fikr-e-suḳhan kā shauq nahīñ ab bazm-e-suḳhan se kaam nahīñ

duniya-e-mohabbat viran hai bechain dil-e-nakaam nahin

pahlu mein nishan-e-zaKHm nahin aankhon mein lahu ka nam nahin

nazron se mili thin jab nazren barbaadi-e-dil ka KHadsha tha

aaghaz hi mein hum samjhe the achchha is ka anjam nahin

mayus-e-payam ab kan bhi hain mahrum-e-takallum hain lab bhi

KHamosh hain wo hum bhi chup hain ab silsila-e-paigham nahin

barbaad-e-mohabbat kar ke mujhe bekar alam hai kyon tum ko

kotahi-e-qismat ka hai gila tum par to koi ilzam nahin

paiman-e-wafa tum toD chuke munh ishq se hum bhi moD chuke

ab dil mein tumhaari yaad nahin ab lab pe tumhaara nam nahin

koyal jo kabhi kuk uThti hai dil mein mere ek huk uThti hai

barson hue tark-e-ulfat ko par dil ko hanuz aaram nahin

tanha jo kabhi rahta hun 'wali' kuchh dil ki kahi kahta hun 'wali'

ab fikr-e-suKHan ka shauq nahin ab bazm-e-suKHan se kaam nahin