duniya hai ye kisi ka na is mein qusur tha

duniyā hai ye kisī kā na is meñ qusūr thā

do dostoñ kā mil ke bichhaḌnā zarūr thā

us ke karam pe shak tujhe zāhid zarūr thā

varna tirā qusūr na karnā qusūr thā

tum duur jab talak the to naġhma bhī thā fuġhāñ

tum paas aa ga.e to alam bhī surūr thā

us ik nazar ke bazm meñ qisse bane hazār

utnā samajh sakā jise jitnā shu.ūr thā

ik dars thī kisī kī ye fankāri-e-nigāh

koī na zad meñ thā na koī zad se duur thā

bas dekhne hī meñ thiiñ nigāheñ kisī kī talḳh

shīrīñ sā ik payām bhī bainassutūr thā

piite to ham ne shaiḳh ko dekhā nahīñ magar

niklā jo mai-kade se to chehre pe nuur thā

'mullā' kā masjidoñ meñ to ham ne sunā na naam

zikr us kā mai-kadoñ meñ magar duur duur thā

duniya hai ye kisi ka na is mein qusur tha

do doston ka mil ke bichhaDna zarur tha

us ke karam pe shak tujhe zahid zarur tha

warna tera qusur na karna qusur tha

tum dur jab talak the to naghma bhi tha fughan

tum pas aa gae to alam bhi surur tha

us ek nazar ke bazm mein qisse bane hazar

utna samajh saka jise jitna shuur tha

ek dars thi kisi ki ye fankari-e-nigah

koi na zad mein tha na koi zad se dur tha

bas dekhne hi mein thin nigahen kisi ki talKH

shirin sa ek payam bhi bainassutur tha

pite to hum ne shaiKH ko dekha nahin magar

nikla jo mai-kade se to chehre pe nur tha

'mulla' ka masjidon mein to hum ne suna na nam

zikr us ka mai-kadon mein magar dur dur tha