duniya-jahan ke jam chhalak jaen ret par

duniyā-jahāñ ke jaam chhalak jaa.eñ ret par

kyā kījiye ki hoñT bahak jaa.eñ ret par

paanī kī chaah bhī ho samundar kā ḳhauf bhī

lahroñ ke saath saath humak jaa.eñ ret par

go laakh sīpiyoñ meñ samundar key qaid hoñ

motī vahī jo phir bhī jhalak jaa.eñ ret par

kaasa har ik sadaf kā luTā jaa.e ashrafī

la.al-o-javāharāt khanak jaa.eñ ret par

Tuk aañkh tū bhī khol ki dariyā ke lab khuleñ

sātoñ dishā ke daañt chamak jaa.eñ ret par

chhan jaa.eñ ras ke farsh se dhartī ke ġhaar meñ

aur āsmāñ kī chhat se Tapak jaa.eñ ret par

rakhiye safar meñ sab kī tan-āsāniyoñ kī ḳhair

aisā na ho ki ghoḌe bidak jaa.eñ ret par

sargoshiyoñ kī mauj kahāñ le ke jā.egī

ham kuchh agar junūn meñ bak jaa.eñ ret par

sūraj ki āsmāñ pe sitāroñ ko Dhāñp le

zarroñ se āftāb damak jaa.eñ ret par

dil kī dhaḌaktī ḳhaak se sāhil banā.iye

paanī ke paañv aaj thirak jaa.eñ ret par

duniya-jahan ke jam chhalak jaen ret par

kya kijiye ki honT bahak jaen ret par

pani ki chah bhi ho samundar ka KHauf bhi

lahron ke sath sath humak jaen ret par

go lakh sipiyon mein samundar key qaid hon

moti wahi jo phir bhi jhalak jaen ret par

kasa har ek sadaf ka luTa jae ashrafi

lal-o-jawaharaat khanak jaen ret par

Tuk aankh tu bhi khol ki dariya ke lab khulen

saton disha ke dant chamak jaen ret par

chhan jaen ras ke farsh se dharti ke ghaar mein

aur aasman ki chhat se Tapak jaen ret par

rakhiye safar mein sab ki tan-asaniyon ki KHair

aisa na ho ki ghoDe bidak jaen ret par

sargoshiyon ki mauj kahan le ke jaegi

hum kuchh agar junun mein bak jaen ret par

suraj ki aasman pe sitaron ko Dhanp le

zarron se aaftab damak jaen ret par

dil ki dhaDakti KHak se sahil banaiye

pani ke panw aaj thirak jaen ret par