دنیا کا ہر ستم تو گوارا کرے کوئی

دنیا کا ہر ستم تو گوارا کرے کوئی

کس دل سے آہ ترک تمنا کرے کوئی

موجوں سے اور بڑھتا ہے احساس تشنگی

دریا کو کس نگاہ سے دیکھا کرے کوئی

آنکھوں میں کوئی حسن کی تصویر ہی نہیں

آئینہ کس خیال سے دیکھا کرے کوئی

دیکھا تھا اس کو یا کہ فریب نظر تھا وہ

کب تک مذاق دید کو رسوا کرے کوئی

سیکھی ہیں کس سے حسن نے ناوک نگاہیاں

انداز دلبری بھی سکھایا کرے کوئی

پھولوں میں رنگ اور نہ غنچوں پہ ہے شباب

کس دل سے گلستاں کا نظارہ کرے کوئی

ہنستے ہیں حال زار پہ احباب اے نذیرؔ

غم کا ہمارے کاش مداوا کرے کوئی