duniya ka har sitam to gawara kare koi

duniyā kā har sitam to gavārā kare koī

kis dil se aah tark-e-tamannā kare koī

maujoñ se aur baḌhtā hai ehsās-e-tishnagī

dariyā ko kis nigāh se dekhā kare koī

āñkhoñ meñ koī husn kī tasvīr hī nahīñ

ā.īna kis ḳhayāl se dekhā kare koī

dekhā thā us ko yā ki fareb-e-nazar thā vo

kab tak mazāq-e-dīd ko rusvā kare koī

sīkhī haiñ kis se husn ne nāvak-nigāhiyāñ

andāz-e-dilbarī bhī sikhāyā kare koī

phūloñ meñ rang aur na ġhunchoñ pe hai shabāb

kis dil se gulsitāñ kā nazāra kare koī

hañste haiñ hāl-e-zār pe ahbāb ai 'nazīr'

ġham kā hamāre kaash mudāvā kare koī

duniya ka har sitam to gawara kare koi

kis dil se aah tark-e-tamanna kare koi

maujon se aur baDhta hai ehsas-e-tishnagi

dariya ko kis nigah se dekha kare koi

aankhon mein koi husn ki taswir hi nahin

aaina kis KHayal se dekha kare koi

dekha tha us ko ya ki fareb-e-nazar tha wo

kab tak mazaq-e-did ko ruswa kare koi

sikhi hain kis se husn ne nawak-nigahiyan

andaz-e-dilbari bhi sikhaya kare koi

phulon mein rang aur na ghunchon pe hai shabab

kis dil se gulsitan ka nazara kare koi

hanste hain haal-e-zar pe ahbab ai 'nazir'

gham ka hamare kash mudawa kare koi