duniya ka ye eazaz ye inam bahut hai

duniyā kā ye e.azāz ye in.aam bahut hai

mujh par tire ikrām kā ilzām bahut hai

is umr meñ ye moḌ achānak ye mulāqāt

ḳhush-gām abhī gardish-e-ayyām bahut hai

bujhtī huī sub.heñ hoñ ki jaltī huī rāteñ

tujh se ye mulāqāt sar-e-shām bahut hai

maiñ marhamat-e-ḳhās kā ḳhvāhāñ bhī nahīñ huuñ

mere liye terī nigah-e-ām bahut hai

kamyāb kiyā hai use bāzār-e-talab ne

ham the to vo arzāñ thā par ab daam bahut hai

us ghar kī badaulat mire sheroñ ko hai shohrat

vo ghar ki jo is shahr meñ badnām bahut hai

duniya ka ye eazaz ye inam bahut hai

mujh par tere ikram ka ilzam bahut hai

is umr mein ye moD achanak ye mulaqat

KHush-gam abhi gardish-e-ayyam bahut hai

bujhti hui subhen hon ki jalti hui raaten

tujh se ye mulaqat sar-e-sham bahut hai

main marhamat-e-KHas ka KHwahan bhi nahin hun

mere liye teri nigah-e-am bahut hai

kamyab kiya hai use bazar-e-talab ne

hum the to wo arzan tha par ab dam bahut hai

us ghar ki badaulat mere sheron ko hai shohrat

wo ghar ki jo is shahr mein badnam bahut hai