duniya ke har KHayal se begana kar diya

duniyā ke har ḳhayāl se begāna kar diyā

husn-e-ḳhayāl-e-yār ne dīvāna kar diyā

tū ne kamāl jalva-e-jānāna kar diyā

bulbul ko phuul sham.a ko parvāna kar diyā

mashrab nahīñ ye merā ki pūjūñ butoñ ko maiñ

shauq-e-talab ne dil ko sanam-ḳhāna kar diyā

un kī nigāh-e-mast ke qurbān jā.iye

mere junūñ ko hāsil-e-mai-ḳhāna kar diyā

Thukrā.e yā qubūl kare us kī baat hai

ham ne to pesh jaan kā nazrāna kar diyā

tere ḳhirām-e-nāz pe qurbān zindagī

naqsh-e-qadam ko raunaq-e-vīrāna kar diyā

mai-ḳhāna-e-alast kā vo riñd huuñ 'fanā'

jis par nigāh Daal dī mastāna kar diyā

duniya ke har KHayal se begana kar diya

husn-e-KHayal-e-yar ne diwana kar diya

tu ne kamal jalwa-e-jaanana kar diya

bulbul ko phul shama ko parwana kar diya

mashrab nahin ye mera ki pujun buton ko main

shauq-e-talab ne dil ko sanam-KHana kar diya

un ki nigah-e-mast ke qurban jaiye

mere junun ko hasil-e-mai-KHana kar diya

Thukrae ya qubul kare us ki baat hai

hum ne to pesh jaan ka nazrana kar diya

tere KHiram-e-naz pe qurban zindagi

naqsh-e-qadam ko raunaq-e-virana kar diya

mai-KHana-e-alast ka wo rind hun 'fana'

jis par nigah Dal di mastana kar diya