دنیا کے مایا جال سے آگے نکل گئے

دنیا کے مایا جال سے آگے نکل گئے

جو ہجر اور وصال سے آگے نکل گئے

سوچا تجھے ہے اتنا کے اس بے خودی میں ہم

اکثر ترے خیال سے آگے نکل گئے

مدت کے بعد پھر کوئی اچھا لگا ہمیں

یعنی کے ہم ملال سے آگے نکل گئے

رشتے کا اک جواب پہ دار و مدار تھا

اور وہ اسی سوال سے آگے نکل گئے

اس اجنبی سے پہلی ملاقات میں ہی ہم

کب جانے بول چال سے آگے نکل گئے

دیکھا اسے جو سامنے آنکھیں برس پڑیں

جذبات میرے حال سے آگے نکل گئے

محرومیوں میں جینا بھی خود میں کمال ہے

دیوانے اس کمال سے آگے نکل گئے