duniya ke maya-jal se aage nikal gae

duniyā ke māyā-jāl se aage nikal ga.e

jo hijr aur visāl se aage nikal ga.e

sochā tujhe hai utnā ke is be-ḳhudī meñ ham

aksar tire ḳhayāl se aage nikal ga.e

muddat ke baa'd phir koī achchhā lagā hameñ

yā'nī ke ham malāl se aage nikal ga.e

rishte kā ik javāb pe dār-o-madār thā

aur vo usī savāl se aage nikal ga.e

us ajnabī se pahlī mulāqāt meñ hī ham

kab jaane bol-chāl se aage nikal ga.e

dekhā use jo sāmne āñkheñ baras paḌīñ

jazbāt mere haal se aage nikal ga.e

mahrūmiyoñ meñ jiinā bhī ḳhud meñ kamāl hai

dīvāne is kamāl se aage nikal ga.e

duniya ke maya-jal se aage nikal gae

jo hijr aur visal se aage nikal gae

socha tujhe hai utna ke is be-KHudi mein hum

aksar tere KHayal se aage nikal gae

muddat ke ba'd phir koi achchha laga hamein

ya'ni ke hum malal se aage nikal gae

rishte ka ek jawab pe dar-o-madar tha

aur wo usi sawal se aage nikal gae

us ajnabi se pahli mulaqat mein hi hum

kab jaane bol-chaal se aage nikal gae

dekha use jo samne aankhen baras paDin

jazbaat mere haal se aage nikal gae

mahrumiyon mein jina bhi KHud mein kamal hai

diwane is kamal se aage nikal gae