duniya ke masail se har waqt ghira hona

duniyā ke masā.il se har vaqt ghirā honā

mushkil to bahut hogā duniyā kā ḳhudā honā

ummīd ke dāman ko chhoḌā bhī nahīñ jaatā

lagtā to hai nā-mumkin va.ade kā vafā honā

jitnī bhī ḳhatā.eñ haiñ yā-rab haiñ javānī kī

jab bas meñ nahīñ hotā achchhā ki burā honā

dashrath kī tarah duniyā chhoḌī bhī nahīñ jaatī

taklīf to detā hai apnoñ se judā honā

bekār banātā hai behāl banātā hai

insān kā apnī hī nazroñ se girā honā

ummīd hai un ko bhī shāyad mire aane kī

itnā to batānā hai darvāze kā vā honā

honā to zarūrī hai har roz ibādat kā

achchhā bhī nahīñ lagtā har roz gila honā

kyā un ko sikhā.egā kyā un ko banā.egā

talvāroñ ke saa.e meñ bachchoñ kā baḌā honā

yāroñ kī mohabbat hai terā bhī karam yā-rab

'parvāz' se insāñ ko har shai kā milā honā

duniya ke masail se har waqt ghira hona

mushkil to bahut hoga duniya ka KHuda hona

ummid ke daman ko chhoDa bhi nahin jata

lagta to hai na-mumkin wade ka wafa hona

jitni bhi KHataen hain ya-rab hain jawani ki

jab bas mein nahin hota achchha ki bura hona

dashrath ki tarah duniya chhoDi bhi nahin jati

taklif to deta hai apnon se juda hona

bekar banata hai behaal banata hai

insan ka apni hi nazron se gira hona

ummid hai un ko bhi shayad mere aane ki

itna to batana hai darwaze ka wa hona

hona to zaruri hai har roz ibaadat ka

achchha bhi nahin lagta har roz gila hona

kya un ko sikhaega kya un ko banaega

talwaron ke sae mein bachchon ka baDa hona

yaron ki mohabbat hai tera bhi karam ya-rab

'parwaz' se insan ko har shai ka mila hona