duniya ki jo KHushi thi wo gham se badal gai

duniyā kī jo ḳhushī thī vo ġham se badal ga.ī

shāyad hayāt ishq ke sāñche meñ Dhal ga.ī

duniyā phirī phirī hai tumhārī nazar ke saath

tum kyā badal ga.e ki ḳhudā.ī badal ga.ī

ruḳh bijliyoñ ne moḌ liyā sū-e-āshiyāñ

aa.ī huī balā mire gulshan se Tal ga.ī

dī hai kisī kī yaad ne dastak kuchh is tarah

jaise sabā qarīb se aa kar nikal ga.ī

merī ḳhushī kī baat kā ab pūchhnā hī kyā

merī har ik ḳhushī to tire ġham meñ Dhal ga.ī

jis shai ko tum ne dekh liyā iltifāt se

vo shai tumhāre husn ke sāñche meñ Dhal ga.ī

vo ḳhairiyat ke vāste ā.eñge ghar mire

shāyad isī sabab se tabī.at sañbhal ga.ī

kitnā qavī junūñ kā hai rishta bahār se

jab bhī bahār aa.ī tabī.at machal ga.ī

duniyā ko ḳhush jo dekhā to maiñ muskurā uThā

duniyā ne jab ḳhushī mirī dekhī to jal ga.ī

'gauhar' girāñ hai merī tabī.at pe kaif-o-rang

haañ dekh kar ḳhizāñ ko tabī.at bahal ga.ī

duniya ki jo KHushi thi wo gham se badal gai

shayad hayat ishq ke sanche mein Dhal gai

duniya phiri phiri hai tumhaari nazar ke sath

tum kya badal gae ki KHudai badal gai

ruKH bijliyon ne moD liya su-e-ashiyan

aai hui bala mere gulshan se Tal gai

di hai kisi ki yaad ne dastak kuchh is tarah

jaise saba qarib se aa kar nikal gai

meri KHushi ki baat ka ab puchhna hi kya

meri har ek KHushi to tere gham mein Dhal gai

jis shai ko tum ne dekh liya iltifat se

wo shai tumhaare husn ke sanche mein Dhal gai

wo KHairiyat ke waste aaenge ghar mere

shayad isi sabab se tabiat sanbhal gai

kitna qawi junun ka hai rishta bahaar se

jab bhi bahaar aai tabiat machal gai

duniya ko KHush jo dekha to main muskura uTha

duniya ne jab KHushi meri dekhi to jal gai

'gauhar' giran hai meri tabiat pe kaif-o-rang

han dekh kar KHizan ko tabiat bahal gai