duniya ki KHwahishat mein uljha nahin hun main

duniyā kī ḳhvāhishāt meñ uljhā nahīñ huuñ maiñ

uḌ jaa.e jo havā meñ vo tinkā nahīñ huuñ maiñ

bīmār un ko dekh ke ḳhāmosh ho gayā

itnā kahā zabān se achchhā nahīñ huuñ maiñ

aatā hai mujh ko markaz-e-tauhīd kā ḳhayāl

muñh se nikal na jaa.e ki banda nahīñ huuñ maiñ

har dam yahī duā hai ki betābiyāñ raheñ

ye haal ho gayā hai ki apnā nahīñ huuñ maiñ

āsāñ nahīñ hai merī haqīqat ko jānñā

mil jaa.e jo sabhoñ ko vo rasta nahīñ huuñ maiñ

mere hī dam se hai ye mire dil kī bekalī

apne maraz kā aap mudāvā nahīñ huuñ maiñ

hai āfiyat meñ jaan jo miltā nahīñ koī

achchhā hai ye 'shamīm' ki achchhā nahīñ huuñ maiñ

duniya ki KHwahishat mein uljha nahin hun main

uD jae jo hawa mein wo tinka nahin hun main

bimar un ko dekh ke KHamosh ho gaya

itna kaha zaban se achchha nahin hun main

aata hai mujh ko markaz-e-tauhid ka KHayal

munh se nikal na jae ki banda nahin hun main

har dam yahi dua hai ki betabiyan rahen

ye haal ho gaya hai ki apna nahin hun main

aasan nahin hai meri haqiqat ko jaanna

mil jae jo sabhon ko wo rasta nahin hun main

mere hi dam se hai ye mere dil ki bekali

apne maraz ka aap mudawa nahin hun main

hai aafiyat mein jaan jo milta nahin koi

achchha hai ye 'shamim' ki achchha nahin hun main