duniya ki saltanat mein KHuda ke KHilaf hain

duniyā kī saltanat meñ ḳhudā ke ḳhilāf haiñ

shahr-e-charāġh meñ jo havā ke ḳhilāf haiñ

farsūda-o-fuzūl rivāyat ke naam par

apne tamām dost vafā ke ḳhilāf haiñ

ḳhāmoshiyoñ ke dasht meñ kyuuñ chīḳhte ho tum

qānūn sab yahāñ ke sadā ke ḳhilāf haiñ

kab se uḌā rahī haiñ qanā.at kī dhajjiyāñ

ye hājateñ jo sabr-o-razā ke ḳhilāf haiñ

insāniyat kī ḳhair ho yārab zamīn par

kuchh be-shu.ūr lamhe fazā ke ḳhilāf haiñ

lab ke tamām harf hue be-asar 'zamīr'

hālāt-e-zindagī ke duā ke ḳhilāf haiñ

duniya ki saltanat mein KHuda ke KHilaf hain

shahr-e-charagh mein jo hawa ke KHilaf hain

farsuda-o-fuzul riwayat ke nam par

apne tamam dost wafa ke KHilaf hain

KHamoshiyon ke dasht mein kyun chiKHte ho tum

qanun sab yahan ke sada ke KHilaf hain

kab se uDa rahi hain qanaat ki dhajjiyan

ye hajaten jo sabr-o-raza ke KHilaf hain

insaniyat ki KHair ho yarab zamin par

kuchh be-shuur lamhe faza ke KHilaf hain

lab ke tamam harf hue be-asar 'zamir'

haalat-e-zindagi ke dua ke KHilaf hain