دنیا کچھ اس طریقے سے صدمے میں آ گئی

دنیا کچھ اس طریقے سے صدمے میں آ گئی

جیسے سمٹ کے اک صدی لمحے میں آ گئی

کوئی گلے بھی ملتا نہ ہو جب کسی سے آج

کچھ بات ہے جو بھیڑ جنازے میں آ گئی

آئینے دیکھنے کا ہنر جب سے چھن گیا

پتھر کی ہر صفت مرے چہرے میں آ گئی

وہ نسل کیا اٹھائے گی اب زندگی کا بوجھ

بچپن سے ہی جو سیدھے بڑھاپے میں آ گئی

پھولوں سی اک زبان سے رشتہ تو ہے مگر

کتنی کرختگی مرے لہجے میں آ گئی

اللہ کا کرم ہی سمجھیے گا آج کل

کوئی صفت جو باپ کی بیٹے میں آ گئی

شاہدؔ پہ مہرباں جو ہوئی ہے کبھی غزل

دہلیز سے اٹھی تو دریچے میں آ گئی