دنیا میں کس کو ہم سے عداوت نہیں ہوئی

دنیا میں کس کو ہم سے عداوت نہیں ہوئی

لیکن ہمیں کسی سے شکایت نہیں ہوئی

ہمدردیاں زمانے کی حاصل نہ کر سکے

ہم سے تمھارے غم کی تجارت نہیں ہوئی

دل سا نگین وار دیں حسن مجاز پر

صد شکر ہم سے ایسی حماقت نہیں ہوئی

ہم نے عدو کی تیغ بھی رکھی سنبھال کر

ہم سے کسی کی شے میں خیانت نہیں ہوئی

سچ ہے کہ زندگی کو سزا جانتے تھے ہم

جب تک کسی کو ہم سے محبت نہیں ہوئی

ہم سرکشی کی ساری حدیں پار کر گئے

ہم کو کسی خطا پہ ندامت نہیں ہوئی

کاشفؔ فقط فریب ہے اپنا فن سخن

حق گوئی کی اگر ہمیں جرأت نہیں ہوئی