duniya mein kis ko humse adawat nahin hui

duniyā meñ kis ko ham se adāvat nahīñ huī

lekin hameñ kisī se shikāyat nahīñ huī

hamdardiyāñ zamāne kī hāsil na kar sake

ham se tumhāre ġham kī tijārat nahīñ huī

dil sā nagīn vaar deñ husn-e-majāz par

sad-shukr ham se aisī himāqat nahīñ huī

ham ne adū kī teġh bhī rakkhī sañbhāl kar

ham se kisī kī shai meñ ḳhayānat nahīñ huī

sach hai ki zindagī ko sazā jānte the ham

jab tak kisī ko ham se mohabbat nahīñ huī

ham sarkashī kī saarī hadeñ paar kar ga.e

ham ko kisī ḳhatā pe nadāmat nahīñ huī

'kāshif' faqat fareb hai apnā fan-e-suḳhan

haq-goī kī agar hameñ jur.at nahīñ huī

duniya mein kis ko hum se adawat nahin hui

lekin hamein kisi se shikayat nahin hui

hamdardiyan zamane ki hasil na kar sake

hum se tumhaare gham ki tijarat nahin hui

dil sa nagin war den husn-e-majaz par

sad-shukr hum se aisi himaqat nahin hui

hum ne adu ki tegh bhi rakkhi sanbhaal kar

hum se kisi ki shai mein KHayanat nahin hui

sach hai ki zindagi ko saza jaante the hum

jab tak kisi ko hum se mohabbat nahin hui

hum sarkashi ki sari haden par kar gae

hum ko kisi KHata pe nadamat nahin hui

'kashif' faqat fareb hai apna fan-e-suKHan

haq-goi ki agar hamein jurat nahin hui