duniya mein kise aag lagani nahin aati

duniyā meñ kise aag lagānī nahīñ aatī

afsos magar sab ko bujhānī nahīñ aatī

tā-hadd-e-nazar dasht hai kyuuñ baiThe hue ho

lagtā hai tumheñ ḳhaak uḌānī nahīñ aatī

vo shoḳh hai bātoñ meñ lagā rahtā hai aksar

suntā huuñ mujhe baat banānī nahīñ aatī

bistar kī zarūrat hī nahīñ niiñd ko pyāre

kyā jism kī chādar hī bichhānī nahīñ aatī

bujhtī hī nahīñ aag lagī hai jo jigar meñ

lekin mire ashkoñ meñ ravānī nahīñ aatī

ḳhushbū se mahaktī hī nahīñ raat hamārī

ḳhvāboñ meñ agar raat kī raanī nahīñ aatī

nādān mirī mez ke shīshe pe gire haiñ

ashkoñ ko bhī tasvīr banānī nahīñ aatī

maiñ ḳhud bhī khilaunoñ kā taraf-dār rahūñgā

jab tak mire bachchoñ pe javānī nahīñ aatī

maiñ sirf haqīqat hī bayāñ kartā huuñ 'aijāz'

afsāna nahīñ aatā kahānī nahīñ aatī

duniya mein kise aag lagani nahin aati

afsos magar sab ko bujhani nahin aati

ta-hadd-e-nazar dasht hai kyun baiThe hue ho

lagta hai tumhein KHak uDani nahin aati

wo shoKH hai baaton mein laga rahta hai aksar

sunta hun mujhe baat banani nahin aati

bistar ki zarurat hi nahin nind ko pyare

kya jism ki chadar hi bichhani nahin aati

bujhti hi nahin aag lagi hai jo jigar mein

lekin mere ashkon mein rawani nahin aati

KHushbu se mahakti hi nahin raat hamari

KHwabon mein agar raat ki rani nahin aati

nadan meri mez ke shishe pe gire hain

ashkon ko bhi taswir banani nahin aati

main KHud bhi khilaunon ka taraf-dar rahunga

jab tak mere bachchon pe jawani nahin aati

main sirf haqiqat hi bayan karta hun 'aijaz'

afsana nahin aata kahani nahin aati