duniya mein koi ahl-e-nazar kya raha nahin

duniyā meñ koī ahl-e-nazar kyā rahā nahīñ

vo sāmne hai aur koī dekhtā nahīñ

aisā bhī inqalāb jahāñ meñ huā nahīñ

din ho gayā hai aur añdherā gayā nahīñ

tum ne bhī kuchh sunā hai mire dil kā mājrā

hai har zabāñ pe aur kisī ne kahā nahīñ

maanā ki maiñ zamāne meñ majbūr huuñ magar

ye ḳhair hai ki tum bhī kisī ke ḳhudā nahīñ

aaj apne āshiyāne meñ bulbul hai be-vatan

sayyād ke bhī ahd meñ aisā huā nahīñ

īmān hai mirā tirī jannat par ai ḳhudā

lekin ye mere ḳhūn-e-jigar kā sila nahīñ

'maikash' mirā bayān zamāne ne sun liyā

hai jis kā zikr sirf usī ne sunā nahīñ

duniya mein koi ahl-e-nazar kya raha nahin

wo samne hai aur koi dekhta nahin

aisa bhi inqalab jahan mein hua nahin

din ho gaya hai aur andhera gaya nahin

tum ne bhi kuchh suna hai mere dil ka majra

hai har zaban pe aur kisi ne kaha nahin

mana ki main zamane mein majbur hun magar

ye KHair hai ki tum bhi kisi ke KHuda nahin

aaj apne aashiyane mein bulbul hai be-watan

sayyaad ke bhi ahd mein aisa hua nahin

iman hai mera teri jannat par ai KHuda

lekin ye mere KHun-e-jigar ka sila nahin

'maikash' mera bayan zamane ne sun liya

hai jis ka zikr sirf usi ne suna nahin