duniya mein koi tujh sa bashar ho nahin sakta

duniyā meñ koī tujh sā bashar ho nahīñ saktā

yuuñ koī kahe laakh magar ho nahīñ saktā

jo kaam hai dil kā vo jigar kar nahīñ saktā

ye dard idhar kā hai udhar ho nahīñ saktā

kyā baiThe haiñ bekār ab uThiye bhī yahāñ se

aġhyār kā ghar aap kā ghar ho nahīñ saktā

ai qalb zarā tū hī kashish apnī dikhā de

nāloñ meñ hamāre to asar ho nahīñ saktā

vo dekh chuke ḳhuub sā jab naḳhl-e-mohabbat

kahne lage is meñ to samar ho nahīñ saktā

maujūd har ik jā hai vo ai nāseh-e-nā-fahm

kā'ba hī ik allāh kā ghar ho nahīñ saktā

duniyā meñ hasīñ laakh hoñ lekin mujhe kyā kaam

ye dil ab idhar se to udhar ho nahīñ saktā

duniyā meñ hasīñ laakh hoñ lekin mujhe kyā kaam

ye dil ab idhar se to udhar ho nahīñ saktā

aañsū kī jhaḌī tū hī lagā de vo na jāneñ

kuchh tujh se to ai dīda-e-tar ho nahīñ saktā

jo chāho kaho ġhair kī tā'rīf meñ lekin

ye siina ye dil aur ye jigar ho nahīñ saktā

haq ye hai ki us āriz-e-pur-nūr ke aage

sarsabz kabhī bhī gul-e-tar ho nahīñ saktā

ai bād-e-sahar hukm jo us kā na ho tujh se

tinkā bhī idhar se to udhar ho nahīñ saktā

allāh musībat se shab-e-ġham kī bachā.e

insān kā patthar kā jigar ho nahīñ saktā

be-fā.eda ġhairoñ se ulajhte haiñ 'fahīm' aap

is se to koī un kā zarar ho nahīñ saktā

duniya mein koi tujh sa bashar ho nahin sakta

yun koi kahe lakh magar ho nahin sakta

jo kaam hai dil ka wo jigar kar nahin sakta

ye dard idhar ka hai udhar ho nahin sakta

kya baiThe hain bekar ab uThiye bhi yahan se

aghyar ka ghar aap ka ghar ho nahin sakta

ai qalb zara tu hi kashish apni dikha de

nalon mein hamare to asar ho nahin sakta

wo dekh chuke KHub sa jab naKHl-e-mohabbat

kahne lage is mein to samar ho nahin sakta

maujud har ek ja hai wo ai naseh-e-na-fahm

ka'ba hi ek allah ka ghar ho nahin sakta

duniya mein hasin lakh hon lekin mujhe kya kaam

ye dil ab idhar se to udhar ho nahin sakta

duniya mein hasin lakh hon lekin mujhe kya kaam

ye dil ab idhar se to udhar ho nahin sakta

aansu ki jhaDi tu hi laga de wo na jaanen

kuchh tujh se to ai dida-e-tar ho nahin sakta

jo chaho kaho ghair ki ta'rif mein lekin

ye sina ye dil aur ye jigar ho nahin sakta

haq ye hai ki us aariz-e-pur-nur ke aage

sarsabz kabhi bhi gul-e-tar ho nahin sakta

ai baad-e-sahar hukm jo us ka na ho tujh se

tinka bhi idhar se to udhar ho nahin sakta

allah musibat se shab-e-gham ki bachae

insan ka patthar ka jigar ho nahin sakta

be-faeda ghairon se ulajhte hain 'fahim' aap

is se to koi un ka zarar ho nahin sakta