duniya mein rah ke duniya mein shamil nahin hun main

duniyā meñ rah ke duniyā meñ shāmil nahīñ huuñ maiñ

lagtā hai is jahān ke qābil nahīñ huuñ maiñ

chhīñTe mirī qabā pe haiñ mere hī ḳhuun ke

maqtūl huuñ maiñ dosto qātil nahīñ huuñ maiñ

kis haq se rok luuñ tujhe o jaane vaale maiñ

sāthī tirā sahī tirī manzil nahīñ huuñ maiñ

ḳhairāt jaan kar mujhe dete ho diid kyoñ

'āshiq huuñ maiñ janāb kā saa.il nahīñ huuñ maiñ

qismat meñ merī likkhī haiñ dar-dar kī Thokareñ

gard-e-safar huuñ raunaq-e-mahfil nahīñ huuñ maiñ

milnā hai ḳhaak meñ mujhe kahtā hai jism ye

detā hai dil sadā ki faqat gul nahīñ huuñ maiñ

fikr-e-suḳhan ko chhoḌ ke aatā hai kyā mujhe

har-chand is hunar meñ bhī kāmil nahīñ huuñ maiñ

yuuñ to kamī nahīñ hai kisī chiiz kī mujhe

hargiz tire baġhair mukammal nahīñ huuñ maiñ

aglā qadam uThā tū 'sadā' dil se pūchh kar

ab 'aql kī salāh kā qaa.il nahīñ huuñ maiñ

duniya mein rah ke duniya mein shamil nahin hun main

lagta hai is jahan ke qabil nahin hun main

chhinTe meri qaba pe hain mere hi KHun ke

maqtul hun main dosto qatil nahin hun main

kis haq se rok lun tujhe o jaane wale main

sathi tera sahi teri manzil nahin hun main

KHairaat jaan kar mujhe dete ho did kyon

'ashiq hun main janab ka sail nahin hun main

qismat mein meri likkhi hain dar-dar ki Thokaren

gard-e-safar hun raunaq-e-mahfil nahin hun main

milna hai KHak mein mujhe kahta hai jism ye

deta hai dil sada ki faqat gul nahin hun main

fikr-e-suKHan ko chhoD ke aata hai kya mujhe

har-chand is hunar mein bhi kaamil nahin hun main

yun to kami nahin hai kisi chiz ki mujhe

hargiz tere baghair mukammal nahin hun main

agla qadam uTha tu 'sada' dil se puchh kar

ab 'aql ki salah ka qail nahin hun main