duniya mein yahi chor banata hai asas ko

duniyā meñ yahī chor banātā hai asas ko

allāh kare qat.a kahīñ dast-e-havas ko

dil detā huuñ maiñ qāmat-e-dil-dār ko apnā

laTkātā huuñ maiñ naḳhl-e-mohabbat meñ qafas ko

jaisā ki ye dil dām-e-mohabbat meñ phañsā hai

kam dekhtā huuñ murġh-e-giraftār-e-qafas ko

nikle haiñ ḳhat-o-ḳhāl lab-e-yār ke nazdīk

allāh ne diyā shahd-o-shakar mor-o-magas ko

dauḌātī hai ye ruuh mirī jism ko har-sū

asvār uḌātā hai zamāne meñ faras ko

zaḳhm-e-dil-e-shaidā huā achchhā na masīhā

ḳhayyāt-e-azal sil na sakā chāk-e-qafas ko

rahte the ham-āġhosh javānī meñ butoñ se

is piirī ke aate hī tarasne lage mas ko

kab pech se is rishtha-e-ulfat ke chhutūñgā

toḌūñgā na jab tak ki maiñ is tār-e-nafas ko

bīmārī-e-ulfat se jo maiñ bach gayā nāseh

Tal jā.ūñgā ab kī kahīñ do-chār baras ko

dāman kā nishāñ hai na garebāñ kā patā hai

ai dast-e-junūñ māntā huuñ maiñ tire bas ko

sayyād jo dekhe mujhe ulfat kī nazar se

gulzār se behtar kahīñ samjhūñ maiñ qafas ko

ai dil kabhī kahne kā nahīñ rāz-e-mohabbat

is dasht meñ dauḌā na tabī.at ke faras ko

dil detā hai us tifl-e-parī-zād ko nādāñ

kyuuñ 'muntahī' sho.ale se bhiḌātā hai tū ḳhas ko

duniya mein yahi chor banata hai asas ko

allah kare qata kahin dast-e-hawas ko

dil deta hun main qamat-e-dil-dar ko apna

laTkata hun main naKHl-e-mohabbat mein qafas ko

jaisa ki ye dil dam-e-mohabbat mein phansa hai

kam dekhta hun murgh-e-giraftar-e-qafas ko

nikle hain KHat-o-KHal lab-e-yar ke nazdik

allah ne diya shahd-o-shakar mor-o-magas ko

dauDati hai ye ruh meri jism ko har-su

aswar uData hai zamane mein faras ko

zaKHm-e-dil-e-shaida hua achchha na masiha

KHayyat-e-azal sil na saka chaak-e-qafas ko

rahte the ham-aghosh jawani mein buton se

is piri ke aate hi tarasne lage mas ko

kab pech se is rishtha-e-ulfat ke chhutunga

toDunga na jab tak ki main is tar-e-nafas ko

bimari-e-ulfat se jo main bach gaya naseh

Tal jaunga ab ki kahin do-chaar baras ko

daman ka nishan hai na gareban ka pata hai

ai dast-e-junun manta hun main tere bas ko

sayyaad jo dekhe mujhe ulfat ki nazar se

gulzar se behtar kahin samjhun main qafas ko

ai dil kabhi kahne ka nahin raaz-e-mohabbat

is dasht mein dauDa na tabiat ke faras ko

dil deta hai us tifl-e-pari-zad ko nadan

kyun 'muntahi' shoale se bhiData hai tu KHas ko