duniya pe mere fan ka asar baad mein hua

duniyā pe mere fan kā asar baad meñ huā

pahle to aib thā ye hunar baad meñ huā

barsoñ sarāb ban ke rahā merī aañkh meñ

ik shaḳhs vo jo dīda-e-tar baad meñ huā

sohbat meñ merī thā to kushāda thī us kī fikr

vo tang-zehn tang-nazar baad meñ huā

ik sher raat zehn ke kāġhaz pe niiñd meñ

hone se rah gayā thā magar baad meñ huā

kūche se us ne mujh ko nikālā to shor kyoñ

aadam kā bhī bahisht-badar baad meñ huā

kahte haiñ log us kī to fitrat thī dhuup kī

vo shaḳhs chaltā phirtā shajar baad meñ huā

ham ḳhānqāh-e-ishq ke pahle murīd haiñ

majnūñ kā to idhar se guzar baad meñ huā

'dilbar' ne baar baar ujāḌā hai luuT kar

ābād apne dil kā nagar baad meñ huā

duniya pe mere fan ka asar baad mein hua

pahle to aib tha ye hunar baad mein hua

barson sarab ban ke raha meri aankh mein

ek shaKHs wo jo dida-e-tar baad mein hua

sohbat mein meri tha to kushada thi us ki fikr

wo tang-zehn tang-nazar baad mein hua

ek sher raat zehn ke kaghaz pe nind mein

hone se rah gaya tha magar baad mein hua

kuche se us ne mujh ko nikala to shor kyon

aadam ka bhi bahisht-badar baad mein hua

kahte hain log us ki to fitrat thi dhup ki

wo shaKHs chalta phirta shajar baad mein hua

hum KHanqah-e-ishq ke pahle murid hain

majnun ka to idhar se guzar baad mein hua

'dilbar' ne bar bar ujaDa hai luT kar

aabaad apne dil ka nagar baad mein hua